hardcore sightseeing :-)

10.07.2015 17:05

mit dr rahel isch o neue schwung bide reisefüdlis aacho. d schwoscht vom elä het es hardcore sightseeing programm zämegsteut.

zersch simer ir nöchi vo tulum di bekanntä cenote ga aaluege u natürli dinne ga bädle. cenote si ungeridischi flüss, wo typisch fürd halbinsle cancun si. es isch e schönä usflug gsi, jedoch heinis d mosquitos deräwä gfrässe, dasmer am schluss nur no chratzend u uf eim bei gumpend wider is outo gflüchtet si.

am nächste tag simer id lagunä bacalar ga kajakle u schwümme - wunderbar. am tag speter simer is riff ga schnorchle u hei wunderschöni risigi schiudchrottä chönne beobachte. ds riff isch farbefroh gsi u dr elä het nach sim rochestich in peru no e mantaroche vo nöchem chönne betrachte.

es isch när witers gange richtig palenque, womer wider es paar "steihüüfe" (mayaruinä) si ga aaluege. ds highlight isch aber dr campingplatz im dschungu gsi. hei ä nid sooo ganz konventionelli duschä gha, nei! si hei e malerchubü mit dräckwasser id "duschkabine" gstellt und es yoghurtbächerli derzuegleit. mitem yoghurtbächerli hetme sech när di brüei chönne übere körper lääre u stouz verkünde "i bi früsch duschet" :-). pfui!

när ischs zum wasserfau misol-ha und agua azul gangä - wunderschöni natur! aaschliessend simer uf san cristobal de las casas id bärge gfahre u heinis zwe tag ir chüele früschi gönnt. d koloniaustedtli isch so härzig gsi, das mir stadtsüschä mönsche sogar e tag lang si ga umeschlendere. mir si derfür mitere beckeri belohnt worde, wo ÄCHTS BROT MIT CHRUSCHTÄ gha het - was fürnä sägä!

witers simer d canyon sumidero ga besichtige. mitem schnäuboot isches zwe stung dürd schlucht gange. mir hei krokis, pelikanä u ganz viu angeri tierli u wundervoui natur gse.

uf das programm abe heimer üs in barra de la cruz und punta zicatela e chilligi wuche am strand mit surfe, feinem ässe usw. erhout. naja, hei no mageverstimmigä gha u de isch es wc ir nöchi dochno so wärtvou gsi :-).

mittlerwile simer in oaxaca iitroffe u heinis no e wundervoui tätschbülä vomne irrä bus-chauffeur la verpassä. armä ferdy. trotzdäm dasmer der bus ire rasante fahrt dürd stadt verfougt hei (di armi rahel i irem mietchrutzli fasch nid nachemöge), het dä blöd busfahrer sech gweigeret aazhaute u dr schadä z reglä. tja, päch gha. derfür heimer üs ds fyrabebier redlech verdient :-).

ad rahel: merci für di bishärige drü läbhafte u schönä wuche mit dir - het mega gfägt!

chille nachem surfe