parque pumalin

d witerreis het üs dür schöni, abwächsligsrichi landschaftä gfüert.

in santa barbara (ca. 300 iiwohner) het üs plötzli einä usemne kontrollhüsli ganz erschrockä u haschtig gwunkä, mir sougi sofort ab derä strass drab. mir hei ke ahnig gha, was dä wott und wieso mer mitts uf dr strass söue cherä u abfahre. dr elä het du när am strassärand e windsack gse hange... mir si ufärä flugzüglandebahn gfahre, hihi. di luschtigä chilenä düe iri landebahnä ide chlinä käffli nid bouä, nei, das isch eifach e abschnitt uf dr houptstrass. u de ischsi haut füre verkehr gsperrt, wenn mau es flugi landet. würkli witzig.

mir si när i parque pumalin gfahre. dert isch 2008 e vulkan usbrochä, wo hüt no röikt ume z gfüeu het, ufem gipfu sigi e waudbrand. ds landschaftsbiud isch einmalig: gad näbem vulkan hets uf glicher höchi schneebedeckti bärgä, am hang vom vulkanusbruch jedi mängi toti böium une flora, wo so übergross isch, dases genmanipuliert usgseht. aui pflanzä si riiisig! blätter mitemne haubä meter durchmässer u me, wod o häräluägsch. es het ä wäg gä für ufä vulkan. mir si froh gsi, dasmer nachem outofahre e chli hei chönne loufe. dr wäg isch du schnäu schlechter us spaziere zum chrakslä wordä. di güetige chilenä hei mit houzträmmlä zwar mängisch so öppis wi stägetritte gmacht, aber dasi bim sabsi fasch hüfthöch si gsi, ischs e sportlächi herusvorderig wordä.

mitts im dschungu hets e art camping platz gha, womer üsäs camp fürnäs paar tag ufgschlagä hei. hie chame d gägend so richtig gniesse u het viu müglächkeitä zum spörtlä: wandärä, dschungutrails mitem bike fahre (meeeega lustig), räsäli für pilates u yoga - aus wos sabsi u dr elä bruchä, um z'fridä ds si.