puerto montt, lago ranco, valdivia und üsäs paradies in coi coi

27.01.2015 21:44

vom parque pumalin us heimer "hurti" 100km uf puerto montt wöue fahre, um di nötigste bsorgige ds erledigä, wome nur in grössere stedt cha mache.

dr wäg hetsech du doch nid aus so "hurti u eifach" gstautet :-). mir hei drü (!!!) mau ufne fähre müesse verladä u hei insgesamt zwe tag bis nach puerto montt brucht. ä landwäg hets gar nid gä.

ufm wäg dert härä häre hets so wunderbari strassä gha, das am ferdy si uspuff zwöimau komplett dürebrochä isch. shit happens. naja, mir hei aui einzuteili chönnä zämäläsä u heis puerto montt e mech gfunge. was ir schwiz ke mönsch me würd aalänge, geschwige de schweisse, isch in chile: "no problema". hihi, di herrä hei dr ferdy innerhaub vorä viertu stung wider zäme gschweisst u mir si mit lächerlächä chf 26.- weniger im portmonnaie wider abzottlät. so cool, da heimer üs glatt no e snack ame iiheimischä frässstand chönne leiste, grins.

wi immer, simer nid lang ir stadt blibe - mir wärdä afa mönschäschüch - u si du witerzoge im lake district.

amne fluss wo i lago ranco fliesst, heimer üses camp ir einsamkeit ufgschlage. dr elä het si virus (hei ke ahnig, wases gsi isch) dert optimau chönne uskuriere. woner de wider fit isch gsi, heter es velotürli für äxtrachranki gmacht (siehe biudli) u es wunderbars 8ti im rad heibracht. tja, iz isch bis santiago ferti mit velölä füre herr. di passendi fäugä gits ersch dert bim fachhändler. ds sabsi hetsech amigs für routene entschide, wos no öppis wine wäg hei gha u cha geng no ga umäpedalä.

dank dr rossbrämäplag simer geng schön beschäftiget gsi, di schissviecher, wo in schwärm aagriffä hei, tot ds schla :-). dr elä het nidmau me in rue chönne sis buäch läsä. (biudimpressionä wi immer ungerhaub vom text :-)).

churzum heimer bi üsem camp bsuech vomne chline ströiner becho. jaaa, mir wüsse, dasme di viecher sött verschüche u nid öppe no füetere. aber üses härz isch sooo weich worde, bi dere süesse hundedamä.

steckbrief:

namä: chilen
gschlächt: diva
bruef: streunär
spezialität: ässä chlaue

das tierli ischis während der ganze zit nümme vor site gwiche u het schlicht aus gfrässä, wore id luckä isch cho (riis, gammufleisch, ä vo üs ganzä klauätä teig usw.). äs het scho baud afa närvä, hihi. hankherum hetsi ungloublech zfridä näb üs chönne pfuse u het jedes mau freud gha, wemer wider vom spörtlä si umecho.

nach ere guete wuche simer witerzoge u hei in valdivia e zwüschestopp fürne grossichouf u wöschätä gmacht. dertä heimer de o chli d stadt erkundet u ds sabsi isch amigs ächli ufdä wäublächstrassä go bike, bisi gnue stoub u sang gfrämslet het gha u wider ume cho isch.

üses nächste camp isch i üsem persönleche paradies gsi! scho chli frustriert, woumer no kes schöns plätzli gfunge hei, simer unverhofft in coi coi (7 personä dorf) amne schildli gfougt, wos "la playa" druff gheisse het. wooooow! mir si amne totau einsamä strand glandet - würkli ganz für üs allei! dr ferdy heimer mit sicht ufs meer ufere chuäweid parkiert u hei kener 10 meter für bis i sang z loufä gha! ächt wunderbar! hie hets sogar seelöiä u delphinä - so dr hammär!

surf versuech in coi coi :-)